ॐ श्रीमत् ही भवऽनी छयम म्य आशा चऽनी

क्षणसय मंज़ दुःख त संकट दूर करतय सऽनी।

छख च़ अरदाह भुज़ भवऽनी छख सहस प्यठ च़य सवार

अन्द्य अन्द्य च्य देवता सऽरी छिय करान च्यय ज़ारपार

अष्टसिद्धि अऽधीन छय पाद चऽन्य न्यथ छलऽनी ।।

सिरिय तय ब्ययि च़न्द्रम छुय प्रारान च्यय हुकमस

कर मऽज्य भबऽञ करि आज्ञा प्रकाश बनि ज़गतस

चानि प्रकाशि किन्य छु सन्तुष्ट त्रिभुवन रोज़ऽनी।।

यलि इन्द्रराज़ ब्ययि दीव अन्य तंग महिषासुरनय

इन्द्राज़ आव च़्यय शरणय पादन च्य प्योय परनय

पत पत तस देवता आयि फ्रकहत्य त दोरऽनी।।

भूज़िथ तिहुन्द हाल अहवाल अद महिषासुर च्यय

वातनोवथन पाताल त्यलि ज़ीर दिच़थस खुर सऽत्य

मोकलऽविथख भय निशिदीव करथक मेहरबानी ।।

ॐ शब्द छख सर्वशक्तिमान महामाया च़्यय वनान

काम क्रोध लोभ ब्ययि अन्धकार भख्त्यन छख च़कासान

चऽनी भख्त्य शिवशक्तिरूप ध्यान चोन धारऽनी।।

बोज़ान छख विनती च़य यति चोनयु छु दरबार

चानि हुक्म सऽत्य सारि ज़गतुक छु चलान अद कारबार

अस्यति आमत्य अर्ज़ करने दोरान त लारऽनी।।

मऽज्य बोज़तम छय म्य हाजथ अख भक्ती चऽनिय

घरि घरि रोज़तम च़ सन्मोख हृदयस मंज़ भवऽनी

सरस्वती हुन्द प्रसाद युथ म्य बनि नेर्यम अमृत वऽणी।।