ज्वालिनी ज्वाला चुॅ पानुॅ माऽज ज़ाला।

ख्रिवि पीठसं प्यठ शूबिथ पानुॅ अगनुॅच माला ॥

दज़वुॅनुॅ रेह चाऽन ज़ोतेयि प्यठ खिव्र तीर्थस।

ग्रज़वुन यूग  'शब्द' ग्रेज़्यव तथ च्य़थ क्वण्डस।

यऽति बीज मंत्रव गाह त्राऽव शिला खण्डस ।

ज़ाला ज़ोतान छय तऽति बिहिथ प्रज़लवॅुनिस परबतस ॥

                         ज्वालिनी ज्वाला चुॅ पानुॅ माऽज ज़ाला॥ 1॥

भस्म छख करान हुँतशीशस पनने स्वभावय।

चाऽनिस च्य़थ अग्नुॅ क्वण्डस बुॅ क्या हुमय ॥

लोल शब्दव दॅुपुॅ दीप पानय बुॅय ज़ालय।

ग्यान रूफॅय पनुन व्यगुॅन्यान बुॅ आलवय ॥

                          ज्वालिनी ज्वाला चुॅ पानुॅ माऽज ज़ाला॥ 2॥

हारुॅ ज़ून पछ च़्वदॅश सपद्येयख अवतीरन ।

इष्ट दीवी पानुॅ बोज़़ सोन लोल-कीरतन ॥

हारने ग्राये तापने चन्ज़े करान छिय नाम स्मरण।

अग्नस अग्नाह ज़ाऽलिथ करान चोन हवन ॥

                             ज्वालिनी ज्वाला चुॅ पानुॅ माऽज ज़ाला॥ 3॥

छख करान ग्रास वखतुॅ-वखतय त्रिज़गतस।

'स्वाहा' शब्दुॅ सूत्य प्रेकाश मेलान भक्तस ॥

ज़ाला सहस्त्रनाम पऽरिथ ईकुत करान वख्तस।

जालवुॅनुॅ च़ऽण्डी छख बिहिथ प्रलॅयुॅकिस तखतस ॥

                                 ज्वालिनी ज्वाला चुॅ पानुॅ माऽज ज़ाला॥ 4॥

ताण्डव वुछुम पानुॅ भस्मीबूत गव शव।

शिव छुय सूॅत्य सूॅत्य, असि कुन कन थव ॥

ख्रिवि नागस प्रज़लवुॅनॅु छि चाऽन्य् प्रव।

चाने अऽग्नय ज्वाला पिंगल लोचनुक 'हुम' प्यव ॥

                                     ज्वालिनी ज्वाला चुॅ पानुॅ माऽज ज़ाला॥ 5॥

बुतराऽच़ मंज नारुॅ रूॅफ छख फऽहलान।

शब्दस मंज़ 'शब्द ब्रह्म' छख पानुॅ व्यछ़नान ॥

चाने 'आहवऽच़व' पाफ साऽरी पानुॅ म्वकलान ।

यूग अऽग्नस मंज़ शाहुॅच खस वस छऽनुॅ बासान ॥

                                     ज्वालिनी ज्वाला चुॅ पानुॅ माऽज ज़ाला॥ 6॥

चान्ये ध्यानय अग्ना नाऽडी छम शोलान।

सूर्या नाऽडी सूॅत्य रे' ह म्याऽन्य् जोतान ॥

माऽतृकायन मंज़ श्री ज्वाला बऽनिथ कायान ।

'जया' छय लोलुॅ पोश अग्नस मंज़ लायान ॥

                                       ज्वालिनी ज्वाला चुॅ पानुॅ माऽज ज़ाला॥ 7॥

साभार: जया सिबू रैना एवम्  मांत्रिक भजन दीपिका ( बीज मंत्रन हुन्द व्यस्तार )

पुस्तक प्राप्ति का स्थान:  डा. अभिनव कमल रैना 2 ख 19, शास्त्री नगर, अजमेर -305001