दपान छस पेयि ना रहम तस संगदिलस

सफेदस कोरनम रंगीन पन

सुय पन आमुत छुम वलन् पानस

ला मकानस गछुन छा सहल॥

गरि बो द्रायस कमिताम हितय

वति प्यठ लाउयनम कम्यताम थफ

दोपनम गछख वन्य कोत च

साउत्य मा यिमय तेलि छुस बुय ॥

अन्द्रिम कथ छय पानस अन्द्रीय

न्यबर वन्नस ज़ोनुम न वार

बोज़खय पोज़ सुय ध्यान स्वरनुय

मन् किन्य परनुय सूहम सू॥

स्योदुय द्रायस मंजमि वते

नय तति हयोर कान्ह नय कान्ह बोन

यिम आउस्य यति तय तिम वुछ म्य तते

नाहकय वते फोलिम पाद ॥

निशान वुछहा तस बेनिशानस

बे निशानस क्या छु निशान

नत् मा वन् बो पननिस पानस

श्री भगवानस साउत्य थव ज़ान ।।

दिह भावसय मंज़ यस शक त भ्रम चले

गले तउमसय वासनायि मूल

तम्यसय मनुक शक त भ्रम चले

सुय ज़न फोले लेम्बि मंज पमपोश॥

आरसय मंज युस आर्वल जन फोले

वुछ वार् पानस अउन्द अउन्द कउन्ड

कन्डयन ति येलि अमृत जल पेय

अद् यी कन्डयन ति पोश् नरमी ॥

साभारः कमला रैना (चौगाम)