दप्याम दयस दिम् लोल नादय

दय्व बोज़ि सुय फरयादय म्योन

अपाउरय यपाउरय चोपाउरय व्यादय

कपाउरय बोज़ि फरयादय म्योन॥

द्वोह गोम वन् कस लोल फरयादय

येति कुस बोज़ि लोल् फरयादय म्योन

चलि येलि द्वोरगत त्यलि गलि व्यादय

अद् बोज़ि लोल् फरयादय म्योन ।।

वुछुम वतन बेयि आकाशन

गाशन गाशीय प्रज़नावान

सिरयि चन्द्रम बेयि तारागन

पानय पानस प्रजनावन॥

आउसस कुनीय तय द्रायम लंजे

अकीय चंजे वाउचस दूर

ग्यूर आम फेरान लंजि पत् लंजे ॥

वन् हा ब हाल पनुन वन् कस

न ब काउन्सि हउन्ज़ न म्य कान्ह

यति कुस कस यियि बकार मरिथ

जिन्दय थविज़े स्वरिथ पान ॥

ब कस जायस म्य कुस ज़ामुत

भ्रम किन्य बासान छु क्याताम

अउछ मुचराउविथ वार् पाउठय वुछतो

सिरयि लूसिथ सपदान शाम ॥

लोकचारस गोम भ्रम पउरय पउरी

सू स्वरय स्वरय राउवम वाउन्स

हू हा कउरय कउरय अन्द्रीय क्रम गोम

दम गोम पानस वन कस हाल ॥

वनहा कथ पनन्य व्यपि मा काउन्सि

वाउन्सि सर् कोर यितुय म्य

पनन्य कथ रूज़उम पानस अन्दरी

सोन्द्री वनतम वन् कस हाल ॥

कस सुन्द गोस छुय गोमुत पानस

कुस छुय चोन तय छुख कम्यसुंद

यउस यि दुतमुत सु हा दियि तिये

कथ प्यठ गोय च्य भ्रम ॥

साभारः कमला रैना (चौगाम)