खोश रोज़ व्यसिये गुलज़ार हय फल्यमित

गुल वुछिथ बुलबुल छु तोशन

बुछन वुछन वख गव नीरिथ

पख ब्रोन्ठ कुन वुछ चेर मा गव ।।

फेरन फेरन दोह गव लूसिथ

पख ब्रोन्ठ कुन वुछ चेर मा गव

आयस कते त गछुन म्य कोतू

पायस पेयस रूदम न हय्स

पकान पकान वख गाव नीरिथ

पख ब्रोन्ठ कुन वुछ चेर मा गव ॥

यो ओस कर्मस ती आव बुथे

नाहकय हन्द्रान मन छुय च

कथ प्यठ लोगुय वाय त वुय

पख ब्रोन्ठ कुन वुछ चेर मा गव ।।

पजिस अपजिस हिसाब लोगुय

बार छुय गोब हय्कखय तुल

कथ प्यठ जुव् गोवुय मन गांगले

पख ब्रोन्ठ कुन वुछ चेर मा गाव ॥

यी छुय कोरमुत ती छुय बुथि

नंत् छा नाहक् लगान हान्छ

यी छुय कोरमुत ती छुख बूगन

पख ब्ोन्ठ कुन वुछ चेर मा गव

कुनुय आसिथ कोता जेठयोख

कुनसीय च़य पूशुख न जान्ह

बेयि सुन्द दपुन जाह मा वेप्योयो

पख ब्रोन्ठ कुन वुछ चेर मा गव॥

यी ओस लिखित कर्म लानिस

ती कानिस वोनुम न जाँह

सोरुय बार खोरुम नख बारय

पख ब्रोन्ठ कुन वुछ चेर मा गव ॥

ज़ान दुनिया तावनुन बाज़ार

नत यति कस अकिस प्यठ एतबार

सरह गव कमलायि सोरुय समसार

पख ब्रोन्ठ कुन वुछ चेर मा गव ॥

साभारः कमला रैना (चौगाम)