सुई छोन्डुम म्य हनि हनि

तनि कोफूर मल्सय

वनि आव सु में हनि हनि

तनि कोफूर मलसय ॥

लोल आम बुक बुक चोन

होल गोम लोल छुम चोन

यि कस् कर्मलोन वनि

तनि कोफूर मलसय ॥

गयूर फेरान फेरान आम

छस ब वतउ शेरान

वति प्यठ क्या सना वन्

तनि कोफूर मलसय ॥

करय ब मोख्तस हार

प्रारान छस गोमच खार

दान् दान अम्बार बनि

तनि कोफूर मलसय॥

रोनि छोनि सेतार साज

कउम बूज़ यी छु राज़

सरह सुय करि हनि हनि

तनि कोफूर मलसय॥

जाम् दउद म्य वउरागय

शाम् रूप कति जागय

शाम रंग गोम मंज मनि

तनि कोफूर मलसय ॥

तम कति दिम् नेरस

हर हर शय् फेरस

च्य त् मय कुनुय बनि

तनि कोफूर मलसय ॥

हय्स त होश व्यसरोमुत

रस् रस् मस प्योमुत

मसतान् पान् कस वन्

तनि कोफूर मलसय ॥

दूरयोमुत सु गौ दूर

चोल्मुत आवलुन ग्यूर

यस बनि तसन चम वनि

तनि कोफूर मलसय॥

मस लोग मसतानन

फेर आकाश थानन

ज्याद क्या छुस ति छेनि

तनि कोफूर मलसय ॥

तारि गामित सारी

भगवान करत् यारी

वति प्यठ कुस कस वनि

तनि कोफूर मलसय ॥

छेन्य वन्दकीय बंदन

बन्द कउर काल् फंदन

अन्द म् रोज़ छुख ब्रोन्ठ कनि

तनि कोफूर मलसय ॥

या दिम भ्रमह व्यचार

नत मसह लाग बे आर

तार दिम तार यिन छेनि

तनि कोफूर मलसय ॥

दास छस चउनिय हरह

पास कर परमीश्वरह

दुय गउज सुय हनि हनि

तनि कोफूर मलसय ॥

मसतान छय कमला

चय सउयीत बे परवाह

जाम चटिनय हनि हनि

तान कोफूर मलसय ।।

साभारः कमला रैना (चौगाम)