पोज़ अपुज़ कउरय कउरय धर्मस गठ गोम

कर्मस पर प्योम बोज्य कुस

यस बो वन्हा सु ना बोज़े

नाहकय रोज़िहे मन गमगीन ।।

पनन्यन निशि गछि हालि दिल बावुन

पननुय पान प्रज़नावुन क्रूठ

पनने पानय गछि व्यचारुन

पननुय पान छुय तारुन क्रूठ ॥

न छुय कान्ह तय न काउन्सि हुन्दुय

नाहकय लोगमुत ज़ालस मन्ज़

ज़ाल गछि चटुन पनने पानय

अद् जानानय दयवु यियि योर ॥

घरनय मन्जबाग ठउरी कम रूदी

गाटल्य मूदी दारि बर दिथ

यिहुन्द सु ओसुय तिम हा ब्योनुय

यि छु न्यथूनोनय नोनय कुनुय गोस ।।

यीय छुय दुनिया कव् छुख भ्रमनय

कोन् छुख शमन वुछ वुछ हाल

द्वोह द्वोह खोतुय लोगुथ खमनुय

वन कमनय सात्य वूनुंथ ज़ाल ॥

हनि हनि म्य च्य दित्यमय वनीय

सउन्य वोगनीय बेयि नो कान्ह

ह्यउरि ति पानय बोन् ति पानय

वुछ दान् दान्य वन क्या हाल ॥

वनिथ क्या हक् कमिताम बहानय

नव नव थल उपदानय छिय

प्रोनुय सोरुय नोव ओपदानय

वुछ पाउन्य पानय पननुय हाल॥

कम कम रंग गय म्य पानस

तीय वनहा तस जानानस बो

यिया योर किन् लारस तोतुय

अद् बोज़ि यती क्या छु म्योन हाल ॥

यिय वोन कमलायि पननिस पानस

कुस वनि तस जानानस म्योन

नत् यिना योर सु जानानय

हनि हनि वुछन पानय बो॥

साभारः कमला रैना (चौगाम)