कस वनय बो तस सिवा न ऐतबार में

अस् वनि मोख् सोरय्व लोकचार म्य

मन छु आव्युल पोश गव पुचपार म्य

कस वनय बो तस सिवा न ऐतबार में॥

सोन्त कालकि वाव सात्य बामुन म्य आव

लोकचार छुय ताज़ यावुन शर म्य द्राव

हरद् वावन त्रांव ज़रदी वार् म्य

कस वनय बो तस सिवा न ऐतबार में ॥

ग्राय दिचनम माय जालन बन्द कउरस

छाय रुदुम क्रीड ज़ालन जन वजिस

मद् वाज्यथस अद् मा ओय आर चे

कस वनय बो तस सिवा न ऐतबार में ॥

हनि हनि फीरिथ ओसुम बाव चोन

यपाउरय द्रायस बूजुम तपाउरय नाव चौन

दर दुनिया हाव सेदि स्योद तार म्य

कस वनय बो तस सिवा न ऐतबार में॥

सुलि वोथहा विलि गछहा बो जंगल

शेहजारस कनि वुछ म्य ज़न नार् त्यन्गल

भ्रम त्रोवनम वार् होवनम बहार म्य

कस वनय बो तस सिवा न ऐतबार में॥

दूरि वनन गव ना तस नाद कनन

यीय छु बनन ती छुम पउज्य पाठय ननन

हनि हनि छनन पउज्य किन्य गव वार् म्य

कस वनय बो तस सिवा न ऐतबार में ॥

राम रामय राम सुन्दुय हाल गोम

त्राहयमाम शरनागतम याद प्योम

भाव् पोषन कउरयमय अम्भार मे

कस वनय बो तस सिवा न ऐतबार में ॥

सुल कउरय कउरय दोह ह्योतनम लोसुनुय

कमलायि भय तय भ्रम कोसनय

सरि बाज़ार पाउन्य पानय तार म्य

कस वनय बो तस सिवा न ऐतबार में ॥

साभारः कमला रैना (चौगाम)