हचर लद छस मचर आम जायि जाये

परान छिम रुम रुम नमः शिवाये

जवानी सूर बुज़र आमुत छु काये

परान छिम रुम रुम नमः शिवाये॥

प्यवान छुम याद सोरुय सु प्रोन करतूत

मउशिथ गोम याद क्या क्या छु सबूत

वुछिथ पानय दपान कर दउयउ म्य साये

परान छिम रुम रुम नमः शिवाये ॥

बुछिथ पननुय पान छस बो व्यचारन

शुरयन बाचन सात्य छस द्वोह निवारन

गउमच गलती कउमिस वापस आये

परान छिम रुम रुम नमः शिवाये॥

वनय क्या, क्या म्यः गुदरयोव आलमसमंज

करान आसस ब चानि पूजायि हुन्द संज

बनिथ आम त्यूत कोरुम कूत त्राहि त्राहे

परान छिम रुम रुम नमः शिवाये॥

म्य त्रोवुमू चानि बापत सोरुय समसार

नत् येति खोश छि सारी वन क्या म्यलार

ब आसस पान गफलतची गोफाये

परान छिम रुम रुम नमः शिवाये॥

च वुछ पानय छि कम रंग संसारस

व्यचारिथ तम्बलावुन शीत जारस

प्यवान चालुन चोक मोदुर जायि जाये

परान छिम रुम रुम नमः शिवाये ॥

करान छस रात द्वोह असतुति चानी

करतम अन्तकालस पालना म्यानी

लगान छुम डर मनस छम थर म्य काये

परान छिम रुम रुम नमः शिवाये॥

वनिथ क्या क्या बनिथ आम यिथ ज़मानस

ति छम सउरय खबर पानस त भगवानस

कउरम छोप् दम वजिस लूक लज़ाये

परान छिम रुम रुम नमः शिवाये ॥

कुनुय मनथउर हावतम सिर्यि प्रकाश

कुनय दयनाव अनतम द्वोन अउछन गाश

कलस प्यठ थवतम अथ कमलाये

परान छिम रुम रुम नमः शिवाये ।।

साभारः कमला रैना (चौगाम)