छानडान सुय बो हनि हनि

वनि यियि यार व्यसीय

अनतन त दीदार बनि

वनि यियि यार व्यसीय॥

कल् वन्द्हस पादन

कन थव लोल् नादन

अपरादन सूर बनि

वनि यियि यार व्यसीय॥

करउन्य गछि पोंपरउन्य गथ

ज्योति सरूपस प्यथ

कनि अदह फारस बनि

वनि यियि यार व्यसीय ॥

सुय गवं वन् वासी

जूग तय सनयासी

उपवास तस छि हनि हनि

वनि यियि यार व्यसीय॥

चम छनउ तस वने

यस आलव गने

शाहमार तसे वलिथ तनि

वनि यियि यार व्यसीय॥

जाम चटिथ तने

सूर मोलुन हनि हने

शान्ति पेयस रूद् कनउ

वनि यियि यार व्यसीय ॥

सोरुय छुय त्यागिथ

चशमन सोरम् लांगिथ

सोरुय तस छु ब्रोन्ठ कनि

वनि यियि यार व्यसीय ॥

कति मरि जिन्दय रूद

जिन्दय गव नाबूद

नाबूद बूदस अनि

वनि यियि यार व्यसीय॥

वुछ फोलन गुल त गुलज़ार

छिय गुलन अन्दि अन्दि खार

कन्डिनय मोख्त मा छेनि

वनि यियि यार व्यसीय ॥

कर नज़र गुलज़ारन

छिय फोलान प्यठ खारन

खार रोस बोय कति अनि

वनि यियि यार व्यसीय॥

खारस कर नमसकार

खार् मन्ज़ फोलि गुलज़ार

नार् दोद मनसूर बनि

वनि यियि यार व्यसीय॥

न्यरलीफ न्यरआललम

छुन् तस कान्सि हुन्द गम

छुय बसिथ सुय च्य मन्ज़ तनि

वनि यियि यार व्यसीय॥

यस तोरय मसतीय

रोज़ि कति तन्ग दसतीय

संग रोस फारस बनि

वनि यियि यार व्यसीय ॥

प्रज़नाव सोन त सरतल

कहवचि प्यठ न्यरमल

वावत प्यथ हनि हनि

वनि यियि यार व्यसीय ॥

प्रज़नाव हय दर हय

छय वज़ान पर्य दर पर्य

राजदान राज़न सनि

वनि यियि यार व्यसीय॥

साभारः कमला रैना (चौगाम)