म्य छुम आमुत चोनुय लोल
Kamla Raina (Chowgam) कमला रैना (चौगाम)
म्य छुम आमुत चोनुय लोल
स्यठा यचकोल प्रारान छस
पज्य पाउठय छुम सु मोज त मोल
स्यठा यचकोल प्रारान छस ॥
दिवान छस वउन्य चवापार्य
म्य त्रोव छाउरय छाउरय साउरसय
म्य बासतम नोन त कासतम होल
स्यठा यचकोल प्रारान छस ॥
म्य दोरुम बाल भावय ध्यान
ति ज़ान्यम दय त पननुय पान
कथ बुज्य बूज्य दिवान कनि डोल
स्यठा यचकोल प्रारान छस ॥
मनस मंज स्वरान ब राम
अउछव साउत्य वुछ म्य पननुय पान
समय छा कान्सि रोज़ान वोल
स्यठा यचकोल प्रारान छस॥
हावि ना म्य सुय दर्शुन
ब करहा पोशनय वर्शन
अगर आसि पानह बोज़न वोल
स्यठा यचकोल प्रारान छस॥
दपान राधा छि कृष्णस कुन
चे त्रविथ सरि राह ब्योन ब्योन
च सारिनय बोय बन्द तय मोल
स्यठा यचकोल प्रारान छस ।।
ब छस वन्य आमउच फटनस
न छुम म्य होश न छुम हस
गयस मस गोमुत छुम म्य होल
स्यठा यचकोल प्रारान छस॥
वुछिथ हाउरथ म्य होरुम
खबर क्या कंउम म्य रथि खोरुम
तवय किन्य छुम गनान म्य लोल
स्यठा यचकोल प्रारान छस ॥
म्य वोत वुछान कोताह काल
यियम कर योर सु बाल् गूपाल
कमिस कमलायि आमुत लोल
स्यठा यचकोल प्रारान छस ॥
साभारः कमला रैना (चौगाम)