पोशव कनि वोथ कनि बारानय

ताज़ अफसानय बोज़

होश् रोज़ वार् बोज़ क्या छु वनानय

ताज़ अफसानय बोज़ ।

जान क्या छु शूबवुन शाह जहानय

वुछवुन पानय ओस

कर्मनि रजउ कम छि वुछानय

ताजु अफसानय बोज़ ॥

अवलय वन क्या ओबरकि बहानय

खस्वनि ही प्यव डोन्ठ

बेय सोन्त कालुक बहार वुछानय

ताज़ अफसानय बोज़ ॥

फीर फीर आलमस गयूर यिवानय

गिरदाबस मन्ज़ गोस

नोज़ुक आउसिथ गोस गज़बानय

ताज़ अफसानय बोज़ ॥

लोकटुय आउसिथ हत् वुहुर पानय

सोरि सामानय ओस

गाट आउसिथ ख्योन इबरथ पानय

ताज़ अफसानय बोज ॥

इबरथ ख्यथ छुन् केन्ह वनानय

प्यतरुन पानस प्योस

लश् नार ओश द्वोद छुन् वसानय

ताज़ अफसानय बोज़ ॥

दूरी कम तस तीर लायानय

सीरन छी सर पोश

कउरनय खामोश ज़न मन्दछानय

अफसानय बोज़ ॥

वतनय प्यठ छुय सोरि सामानय

कथनय कउरनय होश

सउदरउच लउदरमाल दूरि चमकानय

ताजु अफसानय बोज़॥

कमला वन्य कस वन्य देवानय

सउनय पाउन्य पानय गोस

गोस गम मउशरिथ पान पुशरानय

ताज़ अफसानय बोज़॥

साभारः कमला रैना (चौगाम)