च योदवय करख अनुग्रह जायि जाये

अगर म्योन बोजख परख त्राहि त्राहे ॥

खोतुम क्या तकसीर ह्योतुम नाव चोनुय

करूम च़ नज़र म्य छुम भक्ति भावय

म्य करमस स्यज़र कर पनने यछाये

अगर म्योन बोजख परख त्राहि त्राहे ॥

फुलय छि लज्यमउच नव्यन गुलिसतानन

कोह सारन बेयि बियाबानन

तवय वुछ म्य लारान प्रेम त् माये

अगर म्योन बोजख परख त्राहि त्राहे ॥

नवयी वुछ म्य लारन नव्यन गुलज़ारन

नोवुय छु बुलबुल नव्यन आबशारन

छि गाउमच यमबुरज्वल भमभुरनि माये

अगर म्योन बोजख परख त्राहि त्राहे ॥

दिवान नाल् पोशनूल न्यथ प्रभातन

परान सूहम सू अपज्यथ सातन

गोमुत यउच मसरूर बे परवाये

अगर म्योन बोजख परख त्राहि त्राहे ।।

खउटिथ कति रोज़य चटिथ जाम् नेरय

नेरय चवापोर वत् बो शेरय

छु फेरवुन मारकन शान्ति सबायऐं

अगर म्योन बोजख परख त्राहि त्राहे ॥

अजाइब दिललावरस छुन् कान्सि हुन्द डर

बन्योमुत सु बे डर चोलुस जर ज़र ज़र

अनि गट नोन भास्कर प्रजाये

अगर म्योन बोजख परख त्राहि त्राहे ॥

छु गोमुत संगिदिल ज़न संगि फारस

वुछुन गछि प्रकरच बेयि शीतउ ज़ारस

हिवुय तस बहार तय वन्द जाय जाये

अगर म्योन बोजख परख त्राहि त्राहे ॥

वुफवुन हमसा कोर कम्यताम् बन्द

स्यठा सोन कर्मज़ाल तथ मंज़ गोमुत बन्द

सु बोड वीर रउटय तम्य तीर हर शाये

अगर म्योन बोजख परख त्राहि त्राहि ॥

सनिथ गव म्य सोरुय वनिथ हयोक न कान्से

करान असतोति छस नमह शिवाये

अगर म्योन बोजख परख त्राहि त्राहि ॥

फुलय लज्य गुलन बुलबुल छि तोशन

रंगा रंग जानवर छी मन्ज गोशन

मशिथ गव सोरुय मस्ती आये

अगर म्योन बोजख परख त्राहि त्राहे ॥

करख योद क्षमा च्य तमाह नेरि सोरुय

मगर नख्वालुन छु कर्म बोरुय

तिथुय पेयि शान्त शबनम हर जाये

अगर म्योन बोजख परख त्राहि त्राहे ॥

सनी कुस वनी कुस बनी कस यि ताकथ

छ सोरुय त्राउविथ ख्यथ च्यथ जहालत

गंडित गुल्य कउरय अस्तुति कमलाये

अगर म्योन बोजख परख त्राहि त्राहे ॥

साभारः कमला रैना (चौगाम)