कमि वन् अन् ब्यल मादलय

पूज़ायि शिवस लागसय

चाउरय चाउरय थवय ही मसवलय

पूज़ायि शिवस लागसय॥

ओश वोथ म्य अछन अउछनय

पश भाव मश्यराउविथ वनय

आरस मन्ज़ फौलि आरवलय

पूज़ायि शिवस लागसय॥

ओगुन दोगनाव वर म्य दिम

हय्कखय पानस साउत्थ थावुम

वातनावतम नाव यार्बलय

पुज़ायि शिवस लागसय ॥

लोकचारस वजिस मुह भ्रमन

जानन् रुसतय बुय आसन

डुल् त्राउवनस भव आवलनय

पूजायि शिवस लागसय ॥

मन म्योन मद होस कति शमन

मायायि मन्ज़ मस बेयि भ्रमन

काल यिन् वलि मन्ज जालसय

पुज़ायि शिवस लागसय॥

जोश येलि वोथुम होशस प्येयस

समसारस मन्ज़ वन्ब कस

या बोज़ि पानय सु कीवलय

पुजायि शिवस लागसय ॥

व्याद याम चजिम प्रमाद गजिम

साधनाये समाद लजिम

दक् ज़द मोकल्यूव दक् तलय

पूजायि शिवस लागसय ॥

कमि रंग् कम पोश लाग च्ये

भवसागरस मन्ज़ छुम न केन्ह

बस छुम नाव चोन कीवलय

पूजायि शिवस लागसय॥

कमला कमि मानहँ शानय

तारवुन तार दी पानय

तार दितम पननीय यार्बालय

पूज़ायि शिवस लागसय ॥

साभारः कमला रैना (चौगाम)