हाय व्येस्य प्रारून छा रवा

लोल बेमारस वन दवा

लोल बेमार बेमार छा

लोल बेमारस वन दवा ॥

वन् क्या तन् प्यठ सउन् गोम

यन प्यठ नाव चोन याद प्योम

वाव् लदस क्या करि हवा

लोल बेमारस वन दवा ॥

फीर फीर ग्यूर आम पानसय

नेरुन म्य ओस सत नामसय

सुय अगम अनाम छा

लोल बेमारस वन दवा ।

चूरि चूरि हयथ सोदा कोरुम

दूर दूर हयथ आलमन वुछुम

छोनय गोस छोन्यरुक छुम तमा

लोल बेमारस वन दवा ॥

अरहठ यच् प्योम गोम खोखुर

रातस छन् यिवान नेन्दर

ताफ चोल साफ गव ज्योति शमा

लोल बेमारस वन दवा ॥

कर्मफल पयतरुन क्रूठ प्योम

दूरि-२ सूर गोम

धर्मदाता च्य कर क्षमा

लोल बेमारस वन दवा ।।

साफ करतम माफ पाप पोन्य

रोन्य पादन वन्दहाय मोन्य

धन्य धन्य बोलवुन रुम रुमा

लोल बेमारस वन दवा ॥

लोल आम लोल चोनुय म्य छुम

लोल् ओश वसान दारि छुम

हद रोस वज़ान डुम डुमा

लोल बेमारस बन दवा ।।

निर्भय भय रोस थावतम

निशि कलि अमृत चावतम

हावतम गटि अन्दर शमा

लोल बेमारस वन दवा ।।

साय् कमलायि कर सर्सवती

मूक्षदाता च्यय भगवती

बोजनावतम लोल छम छमा

लोल बेमारस वन दवा ॥

साभार: कमला रैना (चौगाम)