कलि कोरमस नाध लोत लोतये

सूरमोतये आंगन चाव

बालि ओसुम लोल आमुतये

सूरमोतये आंगन चाव ।।

मुह राचव करेहस मसय

अनि गटिस रुदुम न ह्यसय

बारि बोर ओस नख्य खोतमुतये

सुरमोतये आगन चाव ।।

माया कालन दित्य बारव

कर्मउनि न्याय मटि कस खारव

ब्रोन्ठ् कनि कयव ति दूर दूर ह्योतये

सुरमोतये आँगन चाव ।।

योद लोगमुत छुय सीथ्य मनस

इसताद ज़न छुय राज़ह कनस

माम ब्यनथर न अथि आमुतये

सूरमोतये आँगन चाव ॥

अपरादुक फल छुय नाशी

कर दया गटि मंज हाव गाशी

सु प्रकाश भगवान् ह्येतये

सुरमोतये आँगन चाव ॥

यी करख ती छुय प्यतरावुन

हाव भावुक अभिमान त्रावुन

नूर भोरतुय छुय सूर मोतये

सुर मोतये आँगन चाव ।।

पमपोशी हय वथरावस

सर पादन तल हयत्रावस

शहनशाह आलमन फयूरमोतये

सूर मोतये आँगन चाव ।।

यूग प्रालभतुक बुगताविथ

बूदयूगकीय जाम् नाल्य त्राविथ

पान् भगवानस पुशरोवमुतये

सूर मोतये आँगन चाव ।।

सहल छुन् समसारस युनुय

माजि मालिस ज्योनुय

प्रउच्च प्यनय अनि गोट वोथये

सूर मोतये आँगन चाव ॥

वासनायन चठ चउ कलय

कमज़ोरन छय गछान ठोलय

प्रतिबन्धव नाल वोलमुतये

सूर मोतये आँगन चाव ॥

कुस ओसय तय कस आसख

भास अभास यती कासख

न्यिराशन गाश आमुतये

सूर मोतये आन्गन चाव ॥

माया ज़ाल छुय काल् फन्दय

अख अकिस सात्य प्रतिबन्दय

कुन त कीवल हयन आमुतये

सुर मोतये आँगन चाव ॥

छल गरीय कउरिनम कम कम छल

पूजायि लागय ब्यल त मादल

लोल कमलायि वन्वुन हयोतये

सूर मोतये आँगन चाव ।।

साभार: कमला रैना (चौगाम)