मनकुय थज़र बनुन पेयि

गय कम म्य अफसानय

मनकुय बजर यि वनुन बेयि

गय कम म्य अफसानय ।।

फलि फलि यि वोवमुत म्य छुम

हलि हलि ति प्यव लोनुन

दान दान मज़ह चशुन पेयि

गय कम म्य अफसानय ।।

वुछ यचकोल बन्धन

ह्योर ह्योर ति छुन अन्दन

जन्दन योताम न नार दियि

गय कम म्य अफसानय ॥

पूरग्रर योताम अज़लुक

करि क्या हिसाब रुसतुय

असलन निशे पथर पेयि

गय कम म्य अफसानय ।।

सोरुय तमाह म्य त्रोवुम

हेछमुत गाटउ खरचोवुम

रोवुम यि रावनय छुय

गय कम म्य अफसानय ।।

दोह पोशि यति आदर

छुख जवानि शेरि नर

लारय्स बुजर पथर पेयि

गय कम म्य अफसानय ।।

छारि कुस शुरयन त बाचन

महा गटि अर्द राचन

करि कुस वफा बद खोयि

गय कम म्य अफसानय ।।

करनुय तमा छु तावन

स्वरनुय छु मन्दछावन

हावान लूकन मिथ्याह छुये

गय कम म्य अफसानय ॥

द्रोख येलि यिवान मुकाबल

पेयि दाना त आकल

अदउ ज़ातकन नज़र दियि

गय कम म्य अफसानय ॥

दूरि दूरि वुछान छि कमला

चोल भय खोफ यकजा

अदह नोन पाठय नचुन हेयि

गय कम म्य अफसानय ॥

साभार: कमला रैना (चौगाम)