म्य वुछ सु पान्य पानय

मोत मसतानय व्यसिये

यियि ना सु जानानय

मोत मसतानय व्येसिये।।

फेरान तस अउन्दि अउन्दिय

कम जाम् छिस मारय मन्दीय

लागस पोशे गोन्दी

छस देवानय व्येसिये ॥

गथ कउरनय ज्योति रूपस

प्रज़लवनिस दूउपस

तति द्वोद पान्य पानय

मोत मसतानय व्येसिये॥

युस द्वोद यति लोल् नारय

यियि कति बेयि दुबारय

ठन्ठ् गव सु पान्य पानय

मोत मसतानय व्येसिय॥

न्याय येलि आयस अन्दन

मोकलेय सारी बन्धन

नज़राह कउरनय ज़न्दन

मोत मसतानय व्येसिये॥

सहल छुन् माया ज़ालय

वोल काल सर्पन नालय

मोकलावि कुस कस पानय

मोत मसतानय व्येसिये ॥

क्या क्या म्य आव बनिथ

यन गोम सु नाद सनिथ

वनिथ क्या हय्क् पानय

मोत मसतानय व्येसिये ॥

वन् कस पनुन हालय

नाल्य गोम माया ज़ालय

कड नाल् सु पान्य पानय

मोत मसतानय व्येसिये॥

सूर गोम ननी तने

फीरस हनि हने

कस वन् क्या गव बहानय

मोत मसतानय व्येसिये॥

लोति लोति कोरमस आलव

बूजुम कोहव त बालव

यी वनी ती बोज़ानय

मोत मसतानय व्येसिये॥

चउटि जाम् म्य हनि हने

सुय ओसम्य ब्रोन्ठ कने

जाम् चउटि म्य पान्य पानय

मोत मसतानय व्येसिये॥

कमला कस वनानय

सतग्वर ईश्वर पानय

बाशान् शाह शोलानय

मोत मसतानय व्यसिये ॥

साभार: कमला रैना (चौगाम)