नाव चानि छस ब तोशन

पोशन ब माल करसय

यचकाल म्य वोत रोशन

पोशन ब माल् करसय ॥

छाया गयम अछन मन्ज़

बास्योम यि मा सु पानय

येमि संदि यिनय ब तोशन

पोशन ब माल् करसय ॥

यव् किन्य म्य धायन चोनुय

ओसुम सु राग प्रोनुय

सोय तार वज़ान म्य गोशन

पोशन ब माल् करसय ॥

कूत काल म्य वोत प्रारान

अशि कनि खून छस हारान

जूनि गाशि चूनि ज़रसय

पोशन ब माल् करसय॥

वन्य छुय दिवान यमबुरज़ल

रात दोह म्य छम सोय कल

यिन् बोम्बर नि पाठय मरसय

पोशन ब माल् करसय ॥

वान्सा म्य वोत प्रारान

वन्य दित्य म्य कोहसारन

यिन् कुनि विज़ि ब डरसय

पोशन ब माल् करसय ।।

लारय ब पत पतय

वुछहा ब चानि वतय

वनतम कमि तार् तरसय

पोशन ब माल् करसय ॥

वननुय स्य्ठाह छु द्वोरलब

कुस ज़ानि म्योन मतलब

यिन कुनि दमकी डरसय

पोशन ब माल् करसय ॥

यति क्या ओस म्य करनुय

ईश्वर नाव स्वरनुय

भव् कालेजस परसय

पोशन ब माल् करसय ॥

कमलायि युतय हावस

ब्यल पूजाय लागस

मालन ब चूनि जरसय

पोशन ब माल् करसय ॥

साभार: कमला रैना (चौगाम)