च छुख ज्योति ब परवानय
Kamla Raina (Chowgam) कमला रैना (चौगाम)
च छुख ज्योति ब परवानय
म्य मा सुय मसतानय गोम
ब लागय पोशि कनि प्राणय
म्य मा सुय मसतानय गोम ।।
अजब जूला वुछुम जोतन
तम्युक गाह प्यव कोहन बालन
म्य मा ज़ोन ओस मा पानय
म्य मा सुय मसतानय गोम ।।
ब बू करनुक वोथ म्य अभिमान
म्य पोरमुत पाठ द्वोरमुत ध्यान
पोज़य वन क्या छु बोज़ानय
म्य मा सुय मसतानय गोम ।।
स्यठा कोमल सफेद कोफूर
सु बलवीर छुय सय्ठा बोहदूर
तमिस मनसूर छीय वनानय
म्य मा सुय मसतानय गोम ।।
दपान छुय हाल पनुन वन् कस
गोमुत समसार् मन्ज बेकस
गोमुत बे ह्यस त बेगानय
म्य मा सुय मसतानय गोम ॥
छु पान् सोरय ज़ानानय
कयामत कथ छि दपानय
म्य मा ज़ोन यिय छु सपदानय
म्य मा सुय मसतानय गोम ।।
वनान छी तस अहनकारी
गमित छिस बुथफिर सारी
तमिस मा केन्ह छु गुमानय
म्य मा सुय मसतानय गोम ॥
योताम कोरुम मोकलनुक सन्ज़
तोताम गयस ब ज़ालस मन्ज़
यि ज़ाल छा कान्ह चटानय
म्य मा सुय मसतानय गोम ।।
अउछव किन्य जन वोथ म्य खून
प्यवान छुम लोल ज़ख्मन नून
समय म ह्यव छु रोजानय
म्य मा सुय मसतानय गोम ॥
गयस फलवाह त बेयि हउरान
छु समसारुक चक्र बदलान
नोवुय नोव रूप छु हावानय
म्य मा सुय मसतानय गोम ॥
वनान कमला छि यि पानसय
हरे राम कासतम मनि दुय
चोपार्य बासतम च पान्य पानय
म्य मा सुय मसतानय गोम ॥
साभार: कमला रैना (चौगाम)