कस वनि हिये सग़ह कनि नार प्योम

बार गोम गोब तय तुलुन क्रूठ

वनुन बनि मा त्रेशि कनि ज़हार चोम

बार गोम गोब तय तुलुन क्रूठ ॥

वनुन मा बनि सनुनय पानस

वनि कुस तस जानानस म्योन                                                     

यिय आम बनिथ तिय गोम सनिथ

कॉसि हय्कुम न वनिथ ज़ान्ह ॥

अन्त मा कुनि समसारक्यन गमन

यिम वलय भ्रमन तिम गय बन्द

कोकालन कलिकालस वोलमुत राग

चल्यमित पज़्य पाठय गव दीश त्याग॥

रोशिकस कान्सि हुन्दुय छुन कान्ह

नाहकय गोमुत छु जालस मन्ज़

दपान वक्तस काँह छुन् पोशान

वखत्य रटान सारिनय तल ॥

क्या वन् यति ना कान्ह काँसि पोशन

यति डज्यमच स्य पारीज़ान

यति मेलन जमीन तय आसमान

यति प्योमुत मान तय अपमान  ।।

दपान वकतस आसान करुन यिय

नाहकय गछान कान्सि हन्ज़ दुय

असली ना येति कान्ह कान्सि हुन्दुय

कथ प्यठ गयी मनि दुय च्य़ेय॥

यिय पान् कोरुथ पनने पानय

तिय दान् दानय तुलुन छुय

तति क्या अथ रोट करि गौरज़ानय

सु पान्य पानय तुलुन छुय ॥

पानस ख्योन मुशकिल बेयस दुयन सहल

बनुन सहल बनुन महाल

पानस पानय तारुन त मारुन

पनुन पानय सिखिम त क्रूठ॥

या गछि यति काँसि वोपकार करुन

नत् छुय पानय मरुन जान

मरन् ब्रोन्ठुय कथ छुय मरनुय

यति छुय सोरनुय पननुय पान ॥

हतो पानो गछतो शरनय

यति छय स्वरनुय पननुय पान

ज़ान कर पानो हर हर परनुय

यति गछि स्वरनुय पननुय पान ।।

कमलायि हयोतनय शिव शिव करनुय

बोज़खय ज़िन्दय मरनुय जान

नत् छुय हरदन्य पोशथर हरनुय

यति गछि स्वरनुय पननुय पान ॥

साभार: कमला रैना (चौगाम)