वुछान वुछान वख गव नीरिथ

पख ब्रोन्ठ कुन वुछ चेर मा गव

फेरान फेरान द्वोह गव लूसिथ

पख ब्रोन्ठ कुन वुछ चेर मा गव ।।

आयस कति तय त गछुन म्य कोतू

पायस प्येयस रुदुम न हय्स

पकान पकान वख गव नीरिथ

पख ब्रोन्ठ कुन वुछ चेर मा गव ।।

यी ओस कर्मस तीय आव बुथे

नाहक्य हउन्द्रान मन छुय च़े

कथ प्यठ लोगुय वुय तय वाय

पख ब्रोन्ठ कुन वुछ चेर मा गव॥

पज़िस त अपजिस हिसाब लोगुय

बार छुय गोबुय हय्कखय तुल

कथ प्यठ जुव् गोय मन गाँगले

पख ब्रोन्ठ कुन वुछ चेर मा गव ॥

यीय छुय कोरमुत तीय छुय बूथे

नत् छा नाहक् लगान हाछ

यीय छुय कोरमुत ती छख भूगान

पख ब्रोन्ठ कुन वुछ चेर मा गव॥

कुनुय आसिथ कोताह ज्य़ेठयोख

कुन्यसय च पूशुख न ज़ॉह

बेयि सुन्द दोप मा व्यपुय

पख ब्रोन्ठ कुन वुछ चेर मा गव ॥

यीय ओस लीखित कर्म लानिस

तीय ना कँसी वोनुम ज़ाँह

सोरुय बार खोरुहमं नख बारय

पख ब्रोन्ठ कुन वुछ च़ेर मा गव ।।

ज़ान दुनिया तावनुन बाज़ार

नत् कस अकिस प्यठ एतबार

सर गव कमलायि सोरुय संसार

पख ब्रोन्ठ कुन वुछ च़ेर मा गव ॥

साभार: कमला रैना (चौगाम)