वॉन्सा गयम घरय करान

यति प्योम परय रूदुम न केंन्ह

सोरिय सोरिय सरह गोम पननुय घरय

यति प्योम परय रुदुम न केंन्ह ।।

वान्सा गयम फेरान् फेरान

सोरान जुव तय लोभुम क्या

कोता काल गोम वुछान यिये

यति कुस दिये त ह्रय्ये कस ॥

न मंग् कंसी तय न कांन्ह दिये

नाहकय बरह गोम हिये पान

नय कान्ह ज़ान्यम नय कान्हज़ानन

यिय छम वनन पनुन पान ॥

कथ प्यठ पानो छुख यीर् गोमुत

सीर् कथ जानी पननुय पान

वुनि छुय वख तय मतउ मशरावतो

गोड प्रज़नावतो पननुय पान ॥

अज़ ताम जान्ह मा प्योख प्रच़ीय

सच़ीय करान लूसुय द्वोह

कव छुख फेरान कोहन त बालन

फेरनं मन्ज़ ना नेरान केंन्ह ॥

आमुत कुनुय तय नेरख कुनुय

वनतो च्य कम्य वोनुय क्या

वनुन क्या छुय चे कुसू बोज़ी

यति नो ज़ानी च्य़ पनुन कांन्ह॥

यति छुख आमुत च़ न तति यादय

बोजि कुस लोल् फरयादय चोन

आसंस बुय तय आसय बुये

च्यये वनतम दूर कव गोख ॥

च्य़ छुख तति तय च्य़ हा यते

म्य बति वति दितमय वन्य

रिनदन आसान जिन्दय मरनुय

ज़िन्दय सरखय मरख न ज़ान्ह ॥

सत सागरस छुय अपोर तरनुय

यति गछि सरनुय पननुय पान

क्या कर् क्या कर् ओसुय करनुय

यति कम्य बोरनख ज़ालस मन्ज़॥

दम् दम् कमला च्यय कुन शरनय

परनउय प्येमच़ दरनय ध्यान

मान तय अपमान यति गछि हरनुय

स्वरनुय दय छुय मरनुयन ज़ान्ह ॥

साभार : कमला रैना (चौगाम)