राजह हंसस आसि गेलन काव बोज़,

वनमूतुय येमि समयुकुय स्वभाव बोज़ ।

सर होखन सागर, होखन दरियाव बोज़,

ग्रजनि लगन डोंफ ह्यनर तलाव बोज़ ।

फाकह फुकरय संतनई आसन लगन,

पापियन गव ख्यन च्यन पुलाव बोज़ ।।

रछिनह कने करि प्रजाये राजह नाश,

गछि इछई बुद्ध राज़नई कन थाव बोज़ ।

साध संत इम तिम गोफनई, पान दिन,

प्रथ कुने चीज़स खोचरई चाव बोज़ ।

गलि स्यज़र पज़र शोज़र दोह खोतह दोहय,

खाल्य कांछा स्वरि दयि नाव बोज़ ।

धर्म त्रावन धर्मी, कर्मी कर्म, यूग यूगी,

भक्ती-जनई भक्ति-भाव बोज़ ॥

ब्राह्मन आसन ख्यवन गाडह त स्यूिन,

ऋशुत नय रोज़ि कुनि हवाव बोज़।

अलिम पर्य पर्य अलिमह स्यीती रावनय,

फोरिथ वननय सु दय कति हाव बोज़ ।।

चाचल मन आस्यख कति गाटहजार,

वेशियन पथ छिवमत्य न्यनि-खाव बोज़ ।

वतह पद्यन मरगुज़ारन पाटनय,

शुमशानन कुनि थवनय न नाव बोज़ ।।

सारिनई मन्दरन मशीदन लगि बाज,

सत वानी बज्यथई मव राव बोज़ ।

मोल गोबरस भोय भायिस माजि कूर,

अख अकिस नय प्रछि काँह आशनाव बोज़ ।।

तीर्य छावल्य ब्रह्मनन निशि आसनय,

हुन्य ह्यथ फेरन बरिथ चिकहचाव बोज़ ।

कामधीनह वातलन निशि आसनय,

कलिकालुक छुय योहय स्वभाव बोज ।।

त्रियिह राजन करनय सखत खमत चम,

आसनख वोहवन पेयिनवह वाव बोज़ ।

त्रियिह राजन खोरई छलनावनय,

सुन्दर-वती दपनख थव नाव बोज़ ।।

कोरि करि माज्य दालज़ अथह दारिसई.

बस कर वा ग्यवनय यूथ त्राव बोज़ ।

फीरिथ उपदीश गुरूसई दियि शश,

गोवेन्दो योहय समय आव बोज़ ।।