योद दथायि हंज़ अलम गिलवि भगवान,
त्येलि सार्यनई स्वर्ग श्रोद छु न्यनि ।
अनुग्रह पननुय करि दीवी,
ज्ञान प्राव दय च्यह वरि दीवी ॥
दीवता सारिय वेशिन ब्रह्मा,
ऐवह रोस्त द्रायि नय शिव त उमा।
क्षमा करवुन सु करि दीवी,
ज्ञान प्राव दय च्यह वरि दीवी ।।
चारि तलह दीवता ति नेरि काँह न शुद्ध,
सारिय तस्य शरण सार्यवई वोद्ध ।
योद वनय प्वोज़ त्येलि च्यह चरि दीवी,
ज्ञान प्राव दय च्यह बरि दोवी ।।
ऋष्य मुनी संतई यूगीश्वर,
च्यह म्य सान सोरुय यि चराचर ।
कर नज़र अन्द्रह न्यबरह धरि दीवी,
ज्ञान प्राव दय च्यह वरि दीवी ।।
त्राहिमाम त्राहे परन सारिय,
बड्य बड्य बलवीर ब्रह्महचारी।
प्यारी दय दुख च्यह हरि दीवी,
ज्ञान प्राव दय च्यह वरि दीवी ।।
कायक वाचक मानस्यक,
ऐब काँह नेरयख अख न अख ।
युथ बक बक हय चोन खरि दीवी,
ज्ञान प्राव, दय च्यह वरि दीवी ।।
ऐबह रोस्त कांह नय समसारस,
मूर्खस प्यठह ताज अवतारस ।
गाटहज रस म फिर लरि दीवी,
ज्ञान प्राव दय च्यह वरि दीवी ॥
दम म मार पानस पख वति स्योद्ध,
छनह दकन हंज़ काम दकलव हय वोद्ध।
थोद गोवेन्द ध्यान हय दरि दीवी,
ज्ञान प्राव दय च्यह वरि दीवी ।।
सु कूस जीव न मंज़ ज़गे.
कथ लजजि न वाव लगे।
यस तगे सुय जीव तरि दीवी,
ज्ञान प्राव दय च्यह वरि दीवी ।।
गोवेन्दह त्राव सारिय शूखई,
असि क्यूत न्यवान ब्रह्महलकई ।
इम सतशोलकई परि दीवी,
ज्ञान प्राव दय च्यह वरि दीवी ।।