क्या ह्यकह वनिथ ज्येवि प्यठ अनिथ,

सुय ज़ानि यस युथ बनिथ आव ।।

घरिय ओसुस छ्यनिथ त छंडिथ,

यादई प्योमो तस म्योन नाव ।

मस गोस कस ह्यकह अन्द्रिम प्रनिथ,

सुय ज़ानि यस युथ बनिथ आव ॥

च्यत बुद्ध मन प्येव वतिय छयनिथ,

दृष्यूक छुय अत्यन्त अभाव ।।

तति क्या मन स्वरि ज्यव ह्यकि वनिथ,

सूय ज़ानि यस युथ बनिथ आव ।

इय गोम सनिथ तिय गोस बनिथ,

क्या म्य रोस्त नय अख हवाव ।

संतन त साधन इहय कथ छि ननिथ,

सुय ज़ानि यस युथ बनिथ आव ।।

केह मुननई केंह मुनन छि छटिथ,

केंचन वुर वुगरह केंचन पुलाव ।

तस त्युथ मज़ह युस युथ ह्य कि रनिथ,

सुय जानि यस युथ बनिथ आव ।।

तन मन धन छ न गुरून कनिथ,

परवाय न केह लूख तुल्यतन ति टाव ।

मालूम तस युस छु दिह निशि तनिथ,

सुय जानि यस युथ बनिथ आव ।।

गोवेन्दन वोन बनिथ त सनिथ,

अदह ना पाठिय बाज़ार द्राव ।

म्वोल कम न गछान किबरई छोनिथ,

सुय ज़ानि यस युथ बनिथ आव ।।