स्वपन्न दृष्टा वतच सोरुय छुख बन्योमुत पानह तय ।

गोवेन्दो सोरुय गोवेन्द छुख च अमि येमि सान तय ।।

अव्यचारस मन्ज़ यि सम्सार, वुछ व्यचारिथ मा कुने ।

असि ति बासे प्रेयि रूपय सोरुय भगवान तय ।।

चई थावर चई जंगम चई आलमई तमाम ।

चई चराचर सोरुय केंह, चई ज़मीन आसमान तय ।।

चई हयोर कुन चई ब्बोन कुन ब्रोठ खोवर्य दछिन ।

छुख कुनुय  दीव चई च्वोपारिय शूभहवुन शूभान तय ।।

आवागंह मन्सह-गोचेर, वांगह मन्सह-गोचरई ।

द्वोश्वय चई द्वोश्वञ ति पर आश्चर श्रीमान तय ॥

गाशूक गाश चई स्वप्रकाश अभय अभिनाश तय ।

शुद्ध विज्ञञानह सदरय वीद छिय वखनान तय ।।

गलि गलि चेयि सम्सारस, थलि थलि शिवई वूछन ।

तिमनई यूगी ज्ञञानी संत दोपुख मस्तान तय ॥

रेयि प्यठह ब्रह्माहस ताज सारिनई हुन्दुय स्वरूप ।

सतचित आनन्द सुय तवय धारनायि ध्यान धार तय ।।

नेय रोस्त यि केंह छय भ्रम कथ क्रया कर्म छुख करान ।

दिह अभिमान त्राविथ रोज़ प्राव सम्यक ज्ञान तय ॥

स्वपन्न दृष्टा वत च सारयुक छुख वूछन वोल पानह तय ।

चई दृष्टा दृश्य दर्शन सारिकुय अधिष्ठान तय ।।

बन्द मुक्ती कल्पित छय न्यति मुक्तई चई सदा ।

गोवेन्दो संतव प्रोव ज़िन्दय निर्वान तय ॥