मटन यात्रा कर च जल बोज
Swami Govind ji
मटन यात्रा कर च जल बोज,
सिरियिबल त्रिकूटी मंडल बोज़ ।।
शिव नेत्र सहसरहदल त्रिकूटी जान,
सुन्न महा सुन्न भंवरगोंफा सतलोक ।
विजिया सप्तमी मूलह तलह बोज़,
सिरियिबल त्रिकुटी मंडल बोज़ ।।
त्रेय बन्द बन्द कर सिरियुक ध्यान,
हृदय शांत बनि निर्मल पान ।
वुज़ि नाद विज़ि विज़ि शशकल बोज़,
सिरियिबल त्रिकूटी मंडल बोज़ ।।
मानसरह मंज़ नागह चाकाये,
युगियव श्रान कोर पज़ि माये।
तमि श्रांनह स्यीत गयि निर्मल बोज़
सिरियिबल त्रिकूटी मंडल बोज़ ।।
ज़िन्दन त मुरदन मुक्ती छय,
करवत्र भगवत भक्ती छय ।
द्वादशी द्वादह शांतह मंडल बोज़,
सिरियिबल त्रिकूटी मंडल बोज़ ।।
मटन श्रांनह ध्यानह हटन पाप,
जन्मातरनई हंद्य ताप शाप ।
तीज़ह स्यीत श्रान कर पान छल बोज़,
सिरियिबल त्रिकूटी मंडल बोज़ ।।
ज़िन्दह श्रान कर गुरू व्यज़ि पाठ्य
इथह पाठय करनई आयि दयि टाठ्य ।
लोलह सान छाव विज्ञानह जल बोज़,
सिरियिबल त्रिकुटी मंडल बोज़ ।
पानसई मंज़ सर्व यात्राये,
करि इमव तिमनई करनह आये ।
कर यात्रा पनून जनम सफल बोज,
सिरियिबल त्रिकूटी मंडल बोज़ ।।
येम्य यात्रा पननी कर पूर,
चकर चुरासी लाख तस सूर ।
संत सदा सुखी निशकल बोज,
सिरियिबल त्रिकुटीमंडल बोज़ ।।
आत्माहस त परमात्माहस बनि यूग,
सूय गव तीर्थ येति चलि भव रुग ।
गोवेन्दह सिरियक्यि पाठ्य प्रज़ल बोज़,
सिरियिबल त्रिकूटी मंडल बोज ॥