विज़ि विज़ि ज़ि शशकल त वज़ि ओमई ।

इज़ि फीरिथ नो दिज़ि नजि पज़ि तमई ।

हरी हरह अमरह अरहसरह मे कास.

ज़िन्दह मरह अज़रह ज़रह ज़रह मे बास ।

पथ हेयम चानि प्रेयमह मे यमई ।।

अस्तह अस्तह खस्तह बस्तह. बस्तह करू प्राणई,

पदि प्यठ स्योद भ्रमदि ओम स्वरानई ।

मदि मयि गाश आव खोत चन्द्रमई ।।

वेरि चानि नेरि शेरि मज़ शेरि प्राणई.

फेरि थोरि होरि अन्दि अन्दि तुलि दुर्दानई।

सू हम सू सननि स्यज़रि तारह त्रमई ।।

सोज़ह सान रोज़ बोज़ छुय वज़ान हमसह नाद,

आदि अन्तह मध्य रोस्त स्वरूप चोन आगाद ।

श्रांन करिज़ि मानसरह खसिजि दिज़ि दमई ।।

हायि ज़ायि तिम नो गयि इम गोफायि चायि द्रायि

पायि तुल आयिकर वायि बर म शिन्य शायि ।

नीरिथ फोरिथ भ्रमधि मंज़ शमई ।।

अनहद ज़मज़म शबनम जन प्यवान,

रसह रसह रस ल्वोग मस गयि रस च्यवान ।

च्यथ नावि रोट संकल्पचे नमई ।।

स्वरह रोज़ सोज़ बोज़ मन करू लीनई,

रंगह रंगह सारंगह चंगह बाजि बीनई ।

मुरली शंख सितारह ड्रमह डुमय ।।

सालिख छि मालिख सुख दुख चालिख,

दव्य तस सोजान तोरय पालिख ।   

स्येदि सादह आज़ादह वादह बन्य छु कमई ।

प्रणवचि रायि त्रायि बोज़ गगराये,

मायि मायायि सान गजि दुय छाये ।

सोरुय शिव पानह चोलमो मे गमई ॥

नाहक छिहन छारान जंगलन त कोहन,

दय त्राव सुय रूद केंह छुख न तस ब्यन ।

गम चोलुम सोरुय मे निशि सु छमई ॥

वरजुन दुरजुन गछि दिह अध्यासई,

नखहवोथ गव नोव प्रोन गोल यम त्रासई ।

मोकल्योव युन गछुन त संसार छु भ्रनई ।।

गोवेन्द सोरुय गोवेन्द ब्यन्दो,

अखंड आनन्द छख च निरद्वन्दो ।

तस चमि यस नो चमि यि चमई ॥