चख त दुय चजिम याम मन्ये, ताम हनि हने शिवई आम वन्ये ।।

न्यत चन्द्रमह सिरयि प्राण मिलनावित,

दादहशांतह मंडलस मंज़ वातहनावित ।

हम सू त्राविथ छोन सू मनि खने ।

ब्रह्महरोन्द्रय मंज्य सुय खसि गगनस,

च्यथ शशिकलि अमृत गछि सुय मस ।

पानह सान शिवई ज़ानि सनि वोगने ॥

जपि छोन सू, हमसू त्राविथई,

परमहगत सुय गछि येति प्राविथई ।

मरह मरह वसवास त्रावि तस्य नने ॥

शख त्राविथ पख प्येठि प्येठि शिने,

सोजह सान बोज़ तति प्रनवचि हिने।

गोसह गम न तस यस पानय बने ।

सरह कोर मंज़ भवहसरह पननुय पान,

अरमान द्राव गयि ज़िन्दह दयि संज़ जान ।

पननुई पान ज़ोन असि हनि हने ।

वछ दयीय सूर असि दिह अध्यास,

चोल मरह मरह गोल यमह सुन्दुय त्रास ।

ज़ाजि दिह-अभिमानचि गासह बने ।

दुख चोल सुख प्रोव पानय प्रजहनोव,

मनह बालक समह रस बर्य बर्य चोव ।

छाज्याव न्यबर्य सुय पत ब्रोंठकने ।

समह रस चव येभ्य तस गव मन शोन्त

ज़ोनुन सम्यक पान येम्य तस्य चोल ब्रोन्त ।

ओन्त वोन्त नो छु मंज़ यस इय सने ।

त्रशिना ममता वासना तस मर

ज़ोंन शीवह सोर येम्य समता कर।

तर तिह-ज़ नाव ज़ानि सुय यस बने ।।

गोवेन्दन सोख्य ज़ोनुन गोवेन्द,

दिह अध्यासह गन्द त्रावन रूद निर्द्वन्द ।

निस्पन्द पान सोनुय कस वने ।।