हृद्या नारायण थान छुम,

जानान् छुम पानस निशे।

हमसू त् सूहम पान छुम,

जानान् छुम पानस निशे।।

1

तुल साज व सामान जीरोबम,

साज़ो सरूदा बोजतम।

सोजस अन्दर ननिवान छुम,

जानान् छुम पानस निशे।।

2

शीशनाग आसन बिराजमान,

सास् मॉख तोता चअनी करान ।

लक्ष्मी सहित शूबान छुम,

जानान् छुम पानस निशे।।

3

खीर सागरस मन्ज़ छी वनान,

तमसन्दि निराकारुक गुमान ।

कारण ब्रम्हा यजदान छुम,

जानान् छुम पानस निशे।।

4

ब्रम्हा, विष्ण, महेश सुय,

त्रेनवय त्रे आकार सुय कुनुय ।

ब्योन-ब्योन म्य मिसुन्द मान छुम, ।

जानान् छुम पानस निशे।।

5

दीवी त् दीवता मनुष्य जात,

जीव, जड़ त् चेतन उतपात।

सोरुय तसुन्द जुवजान छुम,

जानान् छुम पानस निशे।।

6

आकाश पाताल त्रे जगत,

वअन् सअरसई दिथ फेर पथ।

ज्ञानुक सन्यर तय ध्यान छुम,

जानान् छुम पानस निशे।।

7

शूबान शिन्याहस मन्ज़ बिहित,

शिवनाथ जी ब्रेश्बस खसिथ।

भंग मौत हसअ मस्तान्

छुम, जानान् छुम पानस निशे।।

8

केलास वअसी छिस वनान,

गंगा जटव मंज़ छस वसान ।

ओमॉयि स्अत सुय पान् छुम,

जानान् छुम पानस निशे।।

9

रक्ष्पाल सून विष्णु बनिथ,

अमार् त्मिसुन्द छुम सनिथ।

चतुर्बज़ सु बॉड़ भगवान छुम,

जानान् छुम पानस निशे।।

10

मुकट छु शूबान क्याह सुन्दर,

पअरोवमुत छुम मन मन्दर।

विष्णु बिहित तति पान् छुम,

जानान् छुम पानस निशे।।

11

ब्रम्ह रूप जगतच उतपन,

छुय पान चोर वीद वेछनन ।

ब्रम्ह गूम जिगर बिरियान् छुम,

जानान् छम पानस निशे।।

12

कलयुग वअसियन प्येठ दया,

अवतार दअरिथ अज पगाह ।

कृष्णुन रटिथ दामान् छुम,

जानान् छुम पानस निशे।।

13

मुरली मनोहर छिस वनान,

गोपाल गोरेंन स्अत गिन्दान।

नटखट् सुहय शूबान छुम,

जानान् छुम पानस निशे।।

14

मारुन कनुस रट् मनमोहन,

गूपी बनिथ अर्पण च बन।

गरि शुर् बनिथ रोशान छुम,

जानान् छुम पानस निशे।।

15

प्रकाश सिरियस चूनये,

तारामण्डल तय जूने।

पानय सोरूय बहान् छुम,

जानान् छुम पानस निशे।।

16

लब राम, रावुन मा पजी,

सोन् लूअक काया मा दजी।

हेस रठ विभीषण ध्यान छुम,

जानान् छुम पानस निशे।।।

17

चोटनम हनुमानन जिगर,

मन् माल चअपिथ कॉरुन सर।

रुम्-रुम् रुमन मन्ज़ पान छुम,

जानान् छुम पानस निशे।।

18

फुटरिथ छनुन त्रअविथ सु हार,

छुन् राम लीखित क्याह बकार

सीनस अन्दर प्रजलान छुम,

जानान् छुम पानस निशे.।।

19

समसार सागर छुय कठोर,

भक्त्यो गण्डुस सॉथ तर अपोर

तति मूक्षदामुक थान छुम,

जानान् छुम पानस निशे।।

हृद्या नारायण थान छुम,

जानान् छुम पानस निशे।

हमसू त् सूहम पान छुम,

जानान् छुम पानस निशे।।