समसार भ्रम जान आखर छु मरुनुय ।

ऐति गति स्वरुनुय पननुय पान ।।

ग्वोडन्यथ गछतह नई लम्बूदरनई,

सुय चेय हाविय सुय सतचि वथ ।

तारिय सुय चेय च म लाग अरूनुय ।

येति गछि स्वरूनुय पननुय पान ।।

लभकिस चूरस रिन्दह गछि फरूनुय,

शम दम वैराग पहलवान ह्यथ ।

ध्यान करू पानो हरी हरुनुय ।

येति गछि स्वरुनुय पननुय पान ।।

च्यह लोल ओसुय दिगम्बरुनय,

तनह मनह किम व्यचार ओम तत सत ।

आदि दिव चेय गछि तोरय वरुनुय ।

येति गछि स्वरुनुय पननुय पान ।।

स्वप्रकाश गतसई प्यठ गछि दरुनुय,

पथ कुन रोज़िय सुय ख्यथ च्यथ ।

रिन्दह पानह शूभान छु ज़िन्दय मरूनुय ।

येति गछि स्वरुनुय पननुय पान ।।

मस्तानह शूभिय चेय ओम स्वरुनुय,

मरख न जाह तय रोज़ख न्यत ।

वीदव यी वोन ती गद्धि करुनुय,

येति गछि स्वरुनुय पननुय पान ।।

जान पान चई थान वेशीश्वरन्य,

भवसरह तर व्यनारचि नावि क्यथ ।

चई सुय सुय चई यी गछि दरुनुय.

येति गछि स्वरुनुय पननुय पान ।

गोवेन्दह दिह अभिमान गछि हरुनुय

अभोक्ता रोज़ चई ख्यथ च्यथ।

युथ डकख त्यूथ गछि भवसरह तरुनुय ।

येति गछि स्वरुनुय पननुय पान ।।