छारनि द्रास यस दीशि दीशि
Swami Govind ji
छारनि द्रास यस दीशि दीशि.
सुय म्य नीशि पथ कुन ओस ।।
दीशि कालह रोस्त कोरनम उपदीशि,
सतगुरून करह चरणन बोस ।
सारिय चलिम गम कलीशि,
सुय मय नीशि पथ कुन ओस ॥
चोवहस अद्वैतक्य शीशि,
आनन्द मस म्य बर्य बर्य चोस ।।
दाता छेनह आस रागह दीशि,
सुय म्य नीशि पथ कुन ओस ।।
नाटक कर्यमय ब्रोठकनि ईशि,
खुश गोई ज्यनह मरनह निशि मोकल्योस ।
भ्रमह किन दारिम कम कम वीशि,
सूय म्य नीशि पथ कुन ओस ।।
ग्यवान वीद दीवी यस शोशि,
भ्रम च्वोल सुय बुय होशस प्योंस ।
शुद्ध जाग्रतकुय युस व्यशीशि,
सुय म्य नीशि पथ कुन ओस ॥
सगुण रूपह स्यधि दांतह गणेशि,
दुय त्राव सुय सोर पथ पानह बोस ।
कुनय असली ब्योन ब्योन छु वीशि,
सुय म्य नीशि पथ कुन ओस ।।
लछिनोव अकि नावह किन छु कीशि,
तसुन्दुय बजर छिथ खुश गोस ।
शूभायमान अकि रूपह महीशि,
सुय म्य नीशि पथ कुन ओस ।
हनि हनि मंज़ तसुन्दुय प्रवीशि,
असिति भाति प्रेयि रूपह किज हमह ओस ।
च्यनहमातर चई रक्षी कीशि,
सुय म्य नीशि पथ कुन ओस ।।
वायय सूहम सेतारह हमीशि
मनसूरह पानह तुल दुय पोस
प्राण अपानह तारह चार वारह हीशि,
सुय म्य नीशि पथ कुन ओस ।।
नाव वञ दिमह कस सुय भ्य नीशि
गोवेन्दह पान जानिथ आय तोस ।
अयत च्यह दुयितुक न लीशि,
सुय म्य नीशि पथ कुन ओस ।।