म्य हय जेर् उननम सेहरवअल,

हतय बअल नार् हय ज़अजनस।

चोटॅनम जिगर कअतनम म्य अअल,

हतय बअल नार् हय ज़अजनस।।

1

छून्डुम म्य त्रेन जगतन शिवई,

केलास वअसी छुय कुनई।

ब्रेश्बस खसिथ शाहमार नअल,

हतय बअल नार् हय ज़अजनस

2

तस पत् गयस दीवान तय,

जुव जान तस सअती छ लय

पामय दिवान छिम कथ्-कुतअल,

हतय बअल नार् हय ज़अजनस

3

हटि वासुका जेटि छस गंगा,

चन्दरम टॅकुक त्रावान गाह।

शूबान कनन सोन् कन्वअल,

हतय बअल नार् हय ज़अजनस

4

छुम नीलकण्ठ बस्मा मलिथ,

बंगमात छु स्ह मुसलाह

वलिः तस पत् ब् गम्च छस वॉदअल,

हतय बअल नार् हय ज़अजनस

5

तप कअर-कअरी छुम प्रोवमुत,

म्य नय जॉह सु छुय मशरोवमुत

अथवास तस सअत कॉर म्य मअल,

हतय बअल नार् हय जअजनस

6

क्याह गूम ब् योर क्याज़ि आयस्य,

नाथो पेयस वन्य पायस्य।

नार् पान जालय काल कअल,

हतय बअल नार् हय जअजनस

7

नाथन म्य वोन्मुत ओस तती,

माल्युन गछित प्रावख सती।

हुम् पान अग्नस गछ् वॉडअल,

हतय बअल नार् हय ज़अजनस

8

वाखस त् वचनस तमसिन्दिस,

भक्ती बदल करि कमिसन्दिस

तस निश ब् क्याह कर हाल हअल,

हतय बअल नार् हय ज़अजनस

म्य हय जेर् उननम सेहरवअल,

हतय बअल नार् हय ज़अजनस।

चोटॅनम जिगर कअतनम म्य अअल,

हतय बअल नार् हय जअजनस ।।