दुनिया काँसि हुन्द छा गोवेन्दो,

करतहबा बुद्धई वह क्या गोवेन्दो ।

इम आयि तिम गयि येति काँह न रूद,

येति काँसि रोजुन छा गोवेन्दो ।

छन दोह प्रालब्दक्य कटाविथ,

कुनि मो कर धावा गोवेन्दो।

कॉसि हुन्द थव मो रागह दीशिई,

सारिनई दि सुख सीवा गोवेन्दो ।।

अभिमान कथ प्यठ क्या करुनुय,

संसार सोरुय स्वपना गोवेन्दो।

हरशि शूकह रोस्तुय वुछ मुफतुय,

बाह वाह क्या तमाशा गोवेन्दो ।

कात्या आयि गयि संसारस,

ह्य व ब्वोड तीर्थ यि मेला गोवेन्दो।

गोवेन्दह पानई तस्य च पुशिराव,

रोज़वुन अख दय सदा गोवेन्दो ।।