सहज़ह भाव सहज़ह व्यचार, स्यठा दुर्लभ छुय ।

दमह दमह रोज़ि हुशियार, स्यठा दुर्लभ छुय ॥

जानह म्यानि अन्नामस, वातुन निज धामस ।

बोज़ अगम अपार, स्यठा दुर्लभ छुय ।।

ओसुख इय त तिय आस, कास अन्याय अद्यास।

सतस प्यठ यून करार, स्यठा दुर्लभ छय ।।

वासनायि ज़ाल छ्यनुन, मनसई नाश बनुन ।

सत-स्वरूप साक्षात्कार, स्यठा दुर्लभ छुय ।।

वननह स्यीत मासह म्येलि, म्येलि तस युस तेलि ।

दमनई करि शूमार, स्यठा दुर्लभ छुय ।।

ऑरय वुछहय च्यह स्योंद्ध य, गव गुरूस नाठ थोदुय ।।

अन्दह-वन्दह रोंज़ि बहार, स्यठा दुर्लभ छुय ।।

लोलह नारह दिल म्य द्वोदुय, वुछिह्यम स्यदि स्योदुय।

चालहनुय यिह लोलह नार, स्यठा दुर्लभ छुय ।

मरिथ बेयि न ज्योन्य, समह अमृत च्वोंनूय ।

भवसरह लबहनुय तार, स्यठा दुर्लभ छुय ।।

माया कालह जालस, निशि रछ दफ दयालस ।

वातुनुय गुरू दरबार, स्यठा दुर्लभ छुय ।

सूक्षम सुथूल कारन, सारिनई तारि तारन ।

त्वतनय सारिय बार, स्यठा दुर्लभ छुय ।।

वीरन हंज यि वथई, त्राव बा कथह कथई ।

संतई सत सतकुय सार, स्यठा दुर्लभ छुय ।।

गोवेन्दह ज़िन्दह मरुन, करनह अपोर तरुन ।

बन नुय न्यश अहंकार, स्यठा दुर्लभ छुय ।।