मोल माज्य सोरुय च म्योनुई शुर्यबाशेन दाद दिम ॥

नाद हा लायय लोलह सानई ओरह फीरिथ वाद दिम॥ 

अष्टह स्यजह व्यजह नो ब मंगय, यिय मंगय तिय मे दितम

प्रथ दोहय मे दर्शनस क्यु त, संत सतगुरू साध दिम ॥

नय मंगय येरिलूक परिलूक, नय बकुन्ठ मुक्ती ।

जन्मह ज़न्मय चान भक्ती, सीवह पननो पाद दिम ।

पान ह्यथ चई कुल बु वुछहथ इय मे वुछनावतम।

महज़ यूतुय ब मंगय, सहज समाध दिम ॥

बुति छहथ चई चोपारिय, चति तिय वूछनावतम ।

युथ न बुद्ध म्यानी डलिय जाह, प्रथ सातय याद दिम ।।

कुल अद्यासई कासतम मे, भास्तम मे चई चोपोर ।

इमह जंजीरय फुटहरावतम, क्याह करिथ आज़ाद दिम ॥

माया छम छलहरावन, कुसंगय निशि मे रछ ।

प्रथ दोहय प्रथ अख अकिस स्यीत, सतकुय सम्वाद दिम ।।

अम्य दितिम दब क्यीत्य मे दित्यमस मस्त बेखुदई करुन ।

युद्ध छु ल्योगमुत स्यीत मनस, दूर करिथ फसाद दिम ।।

माया काल त्येलि न पोशम, लोल चरणन हन्द मे दिम ।

सूय ब हावख त्रहरावख, जल पनून इरशाद दिम ।।

इथह पाठ्य छारान ब छुस चे, तिथह पाठ्य छार चति मे ।

यारय छुख करतह यारी ओरह मे नाद दिम ।।

याँ दितम त्युथ ताकतई में, युथ दिमय सारिज सखई।

नत म हावतम कासि हुन्द दुख, क्याह करिथ दिलशाद दिम ।।

वोव ज़मीनस रुत में ब्योलय, चान लोलय लोलये।

छुय बनान गोवेन्द कोलुय, अथ करिथ आबाद दिम ।।