त्राहि त्राहि पननुय सायि थावूम, ज़्यनह मरनह निशे मोकलावुम॥

कम्भी-पाक नरकच्य छम म्य थर बेयि गछनह लगुन अथ अन्दर॥

ही नाथ कर दया बचिरावुम, ज्यनह मरनह निशे मोकलावुम।

शरणे आवूय शरनागत,

रछतन चेय निशि क्या छय कथ।

सथ छम परमह-गथ प्रावनावुम,

ज्यनह मरनह निशे मोकलावूम ॥

कमह हीन्यर किन जनमस आस,

वञ चोय पेयतनय पननुय पास।।

पननुई दास म्येति गन्ज़राम,

ज्यनह मरनह निशे मोकलावुम ।।

असिति चेय प्यठ त्रोव पननुय बोर,

इय चेय खुश छुय सोन क्या ज़ोर ।

येमि योर वञ मसह मन्दछाबुम,

ज़्यनह मरनह निशे मोकलावुम ।।

कुस ने रोस्त छुम तस वनह अन्द्रिम,

कात्या दाद्य चाज जिगरस छिम।

निम पानहसई स्यीत योर म त्रावम,

ज्यनह मरनह निशे मोकलावुम ।।

थलि-थलि छहत चई पानह सान,

गोवन्दस ति दितह शिवनिर्वान ।

अरमान इय छु अमृत चावूम,

ज्यनह मरनह निशे मोकलावुम ।।