वनतय यारस लोलह नारह ज़ोलनम तन मन तय ।।

अछह रछह वय सोन गिन्दनि अडरातन तय ॥

व्यचारह वाज़ि ध्यानह थाजे क्यथ गालन तय ।।

छुम इह गोसोन सरतले सपदुम स्वन तय ।।

सूहम फोकहनारि फोख दिनह लोलह नार तेज़न तय ।।

होशिकि काँटह वीदह परमानव छुम तोलन तय ॥

शमह दमह संतोशि वैरागह जमह सोज़ दिवान तय ।।

सतसंगह श्रधायि कहवचि प्यठ छुम वछन तय ॥

ज्ञानह नारह विवेकह अभ्यासह स्योत छुम पयन तय ।

दुय चख हसद मल खोचिरई छुम दज़न तय ।।

सतगुरू इह स्वनूर फुटिमित्यसई छुम वाटन तय ।

स्वन वूछ कुनुई ब्योन ब्योन नावई भूशन तय ।।

बोटह छम तुलान चंचल च्यथ सीमाब ज़न तय ।

टोठ स्वन ने स्यठा छुहस बनिहे अभ्यन तय ।

सतचित आनन्द सोन आत्म छु कुन्दन तय ।

मोलहवून छु कथ म्वल ना कुनि नेरि वुछ गोवेन्दन तय ।।