श्री भगवानो लायय लोलह नादा
Swami Govind ji
श्री भगवानो लायय लोलह नादा।
राधा-स्वामी लोल हय आम ।।
स्यद्यन सादन चोनुय प्रसादा,
साधन पादन छुय प्रणाम ।
साधन मंज़ नालायक बो साधा,
राधा-स्वामी लोल हय आम ।।
चई मोल माज्य दादा परदादा,
जुव सोनुय शिव साल्यगराम ।
उस्ताद उस्तादन उस्तादा,
राधा-स्वामी लोल हय आम ।।
नामह-स्मरण मन म्योन प्रहलादा,
करहवुन गरि गरि चोन न्येशकम ।
लोल दिम पननुय ज़्यादह ज़्यादह ज़्यादा,
राधा-स्वामी लोल हय आम ॥
संतन स्यीती करह सम्वादा,
गुज़राव ना बो सुबह तय शाम ।
सीवहवञ रोज़हा चाजा पद्म पादा,
राधा--स्वामी लोल हय आम ॥
जन्मन हज़ई कास वुपादा,
रोज़य शहरह या रोजय गाम ।
सहजभाव दिम सहज समाधा,
राधा-स्वामी लोल हय आम ।।
अगम अलख अन्नाम अमाधा,
संतव प्रोव ने मंज़ विश्राम
चानि अनुग्रह स्यीत रूज़ख न व्यादा,
राधास्वामी लोल हय आम ।।
ज़िरात ब्यूठ छुम त्रावुस कादा,
पोखतह बनि दानह दानह रोज्यस न खाम ।
अनुग्रह चानि स्यीत बनि सु आबदा,
राधा-स्वामी लोल हय आम।
संतन हुन्दुय छुस ब अवलादा,
संतई म्य मोल माज्य संतई माम।
संतन हंदि प्रसादह गोस आबादा,
राधा-स्वामी लोल हय आम ।।
मह यस गलि रोज्यस न केह व्यादा,
अन्दवन्द केंह न तस इयि वुलाम ।
ज़्यनह मरनुक तस मोकल्योव म्यादा,
राधा-स्वामी लोल हय आम॥
गोवेव्दन कोर चेय फरियादा,
इम दिम दशुन निम निजधाम ।
ही शिवह कोरमुत च्येति छुय वादा,
राधा-स्वामी लोल हय आम॥
***
मन सफेद केपड़ा है। इसे जिस रंग में डुबाओगे वही रंग चढ़ जायेगा।