सतगुरू पादन तल च न्यम, कन थव वज़न छय जीरहबम ।

तस नाव क्या छुसुय निशान, वनतो खबर क्या छुख वूछान ।

छावान गोख बागे-इरम, कन थव वज़न छुय जीरहबम ।।

मस कम्य द्यु तुय मस्तानह गोख, उडनई च पथ असमान गोख ।

वुछान गोख क्या दम ब दम, कन थव वज़न छुय जीरहबम ।

वनतो खबर तमि तोर छु क्या, हैरत हैरत हैरता ।

अथाह अथ नाव छुय अगम, कन थव वज़न छ्य ज़ीरहबम ।।

गुरूनई च कीवल हाल भाव, निर्मलसई मंज़ चाञ नाव ।

रूप नाव न तथ लेखिय कलम, कन थव वज़न छुय जीरहबम ।।

धुन्नात्मक छुय सुय शब्द, सुय ज़ानि यस यस सू सपूद ।

उद्योगी छुख छुय न गम, कन थव वज़न छुय जीरहबम ।।

तिम तिम वात्य सतधामये, अलख अगम अन्नामये ।

सतनावसई बरिथई प्रयम, कन थव वज़न छुय जीरहबम ॥

सारह शब्दकेद्रसय, सतलोक खसू रसय रसय ।

चोवहस मसई प्रोव परमह शम, कन थव वज़न छुय जीरहबम ।।

सत शब्दक क्या छय निशान, मन प्राण यकदम तय खिचान ।

निर्वान दियिय नियिय अगम, कन थव वज़न छुय जीरहबम ।।

नादस त ब्यन्दस गव अपोर, गोवेन्दह यस तोरुक छु ज़ोर ।।

योरुस दयालन छुम कसम, कन थव वज़न छुय जीरहबम ।।