आमुत शरण छुस इय नय आर,

ही नन्दकीश्वर बोज़ जारपार ।

छुस बेकस तय स्यठाह लाचार,

ही नन्दकीश्वर बोज़ जारपार।।

9

दूरि पेंठ चेय निश आस लारान,

नेत्रव प्रेयमुक खून हारान ।

बूजुम म्य यति छिय चून दरबार,

ही नन्दकीश्वर बोज़ ज़ारपार ।।

10

अज़तामथ स्यठाह तुज म्य खअरी,

जार बोज पादन लगय पअरी।

कास खअरी छुख बख्शनहार,

ही नन्दकीश्वर बोज़ जारपार ।।

11

चेय रोस्त कस वन् छुस चून दास,

आश छम चअनी कर म्यून पास ।

शीतल स्वभाव किन वाल पाप भार,

ही नन्दकीश्वर बोज़ जारपार ।।

12

नज़राह करतम छुख दयावान,

अज्ञान गट कास दिम च्य ज्ञान ।।

ध्यान चूनुय धारहा बार-बार,

ही नन्दकीश्वर बोज़ जारपार ।।

13

पानस सअती करतम लय,

ही नन्दकीश्वर बोयिनय जय ।।

चानि सत् संग सअत बल् बेमार,

ही नन्दकीश्वर बोज़ जारपार ।।

14

हरी ऑम तत्सत परनावतम,

सत्ची वथ म्य च्य हावतम।

कास्तम दोख तय दअद् यक्बार,

ही नन्दकीश्वर बोज़ जारपार ।।

15

राज़ क्याह बावय छुस बे-ज़बान,

अन्तरयामी छुख कासतम हान।

सात्-सात् चेय कुन कर नमस्कार,

ही नन्दकीश्वर बोज़ ज़ारपार ।।

16

गुल्गाम् कन थावतम नादन,

विल्गाम वअतिथ थावुम लादन।

सीर्-जअगीर चून बोंढ दरबार,

ही नन्दकीश्वर बोज़ जारपार ।।

17

आमुत दूरि भक्ति छु लारान ,

 नन्दकीश्वरनि डेढि तल प्रारान ।

अथ् दअरित छुस कीछाह म्य यार,

ही नन्दकीश्वर बोज़ जारपार ।।

आमुत शरण छुस इय नय आर,

ही नन्दकीश्वर बोज़ जारपार।

छुस बेकस तय स्यठाह लाचार,

ही नन्दकीश्वर बोज़ जारपार ।।