यादे कश्मीर
डा बी के मो़जा
रूज़िथ अंदर यथ गुंजान नगरस यादे कश्मीरय क्या करव ।
बागि निशातस शूबि शालमारस यादे ल्वकचारस क्या करव।।
नालन त बालन मॅशरावव क्याह यार्यन त महारेन्य स्वनवार्यन।
कुकिले बोलबोश सोपनन संवारान यादे संतूरस क्याह करव।।
गर्दि गुबार दह्य गटकार अथ प्यठ येति छुय लूक च्यलचार।
शीशनागस त शांत बागस तथ नागे व्यचा़रस येति क्याह करव।।
केंह येति शोलान मॅहलातन मंज़ त कत्याह छि डोलान फुटपाथन।
पॅट गंडव अॅछन थोप दिमव कनन दिले बेचारस क्याह करव।।
ज़िदगी कचा़ह तूफान मेल फरसथ कति छि येति छुय जेल ।
फ्रख कति त्रावव द्वख कति बावव यॅडि लाचारस क्याह करव।।
येति छुय इनसान मॅशरावान इनसानियतक्य सब सामान।
मिशीनि हुंद छुय ठिन्य ठिन्य ठीन्य रेश्य प्रचा़रस क्याह करव।।
छूयन गाॅमत्य पर गाॅमत्य त कथ बाथि खाॅतरय दर गाॅमत्य ।
दूर गोमुत कूत दूर गोमुत तथ बाॅय बेनिचा़रस क्याह करव।।
वतनस साॅनिस क्याह आव वाव छॅकरन अॅस्य आयि बेयि छूयोन बाव।
रीथ तय प्रीथ रूज़ तॅत्य बालायि ताख मॅत्य ग्रहचा़रस येति क्याह करव।।
रूज़िथ अंदर यथ गुंजान नगरस यादे कश्मीरस क्या करव।
बागि निशातस शूबि शालमारस यादे ल्वकचारस क्या करव।।
साभारः आलव April 2007 व डा बी के मो़जा